Тут спалучаюцца навука і мастацтва. У Мінску адкрылася антарктычная фотавыстаўка

16 красавіка ў галерэі «Панарама» Нацыянальнай бібліятэкі адбылося адкрыцце выстаўкі «Жывыя камяні Антарктыды», прымеркаванай да 70-годдзя Беларускага геаграфічнага таварыства. Экспазіцыю складаюць фотаработы палярніка Юрыя Рыгоравіча Гігіняка, першага беларускага біёлага на ледзяным кантыненце.

Прыйшло шмат навучэнцаў, былі і дарослыя. У час цырымоніі адкрыцця прадстаўнікі БГТ заклікалі школьнікаў прыгледзецца да прафесіі географа, а даследчык Ю. Р. Гігіняк параіў усім звярнуць асаблівую ўвагу на фатаграфіі «жывых» камянеў мудрагелістых форм, абточаных самой прыродай. Найбольш яскравыя эмоцыi у наведвальнікаў выклікалі выявы жывёльнага свету Антарктыды — цюленяў і пінгвінаў.

Работа выстаўкі плануецца да 21 траўня (апошняя дата можа быць скарэкціравана). На ўваходзе трэба аплаціць кошт наведвання агляднай пляцоўкі.

Вольга Балуканіце