<p><strong>Спектаклі для дзяцей і дарослых пакажа ў рамках XXI Нацыянальнага фестывалю беларускай песні і паэзіі Мінскі абласны драматычны тэатр у Маладзечне.</strong></p>
<p>10 чэрвеня ў 11:00 юных гледачоў чакае музычная казка-жарт па п’есе Сяргея Казлова ў перакладзе Юрыя Куліка “Нельга нам без сябра”. Спектакль, а ісці ён будзе на беларускай мове, раскажа пра Парася, якое спявае. Шкада толькі, што ў вёсцы ніхто ў гэта не верыць. Больш таго, таленавітаму падсвінку пагражае невясёлая перспектыва ператварыцца ў пачастунак да святочнага стала ў гонар яго гаспадыні. Добра, што наш герой зусім не з тых, хто паддаецца злому лёсу! Ён уцякае ў лес, дзе сустракае вернага сябра — Зайца. Разам таварышы перамагаюць злога Ваўка, пераадольваюць перашкоды і пераконваюць усіх прызнаць цудоўны талент Парасяці-спевака!</p>
<p><img class="alignnone size-full wp-image-134849" src="https://mlyn.by/wp-content/uploads/2022/05/5_2605.jpg" alt="" width="450" height="636" /></p>
<p>“Сцеражыся, Леапольд!” — казка-гульня па матывах п’есы Аркадзія Хайта “Дзень нараджэння ката Леапольда”, якую Мінскі абласны драматычны тэатр у Маладзечне пакажа 11 чэрвеня (11:00). Доўжыцца спектакль — гадзіну.</p>
<p>Ну, а дарослага гледача чакаюць спектаклі “Дядюшкин сон” па п’есе Фёдара Дастаеўскага (11 чэрвеня ў 15.00) і гістарычны дэтэктыў, заснаваны на рэальных падзеях, якія адбыліся ў пачатку XVII стагоддзя ў Мінскім ваяводстве, — “Сёстры Дастаеўскія” (10 чэрвеня, у 18:00 г.).</p>
<p><img class="alignnone size-full wp-image-134848" src="https://mlyn.by/wp-content/uploads/2022/05/4_26045.jpg" alt="" width="450" height="630" /></p>
<p>— Заблытанае злачынства расследуе вядомы ў той час земскі суддзя Андрэй Станкевіч, якога называюць беларускім Шэрлакам Холмсам, — анансуе спектакль кіраўнік літаратурна-драматычнай часткі тэатра Таццяна Князева. — За час сваёй кар'еры суддзя заслужыў рэпутацыю прыстойнага, непадкупнага чалавека і выдатнага прафесіянала. У маёнтак ён прыязджае са сваім адданым і правераным сакратаром і памочнікам Феліксам Віславухам. Аднойчы суддзя выратаваў яго ад смяротнага прысуду, за што Віславух пакляўся служыць верай і праўдай свайму ратавальніку. Пад падазрэннем аказваецца ўсё блізкае акружэнне забітага — Казімір, родны сын ад першага шлюбу, удава Марына Карловіч (у дзявоцтве — Дастаеўская), яе родная сястра Раіна Дастаеўская, кіраўнік маёнтка… Глядач стане сведкам мноства цікавых сюжэтных паваротаў і паспрабуе адгадаць: хто ён, гэты выкрутлівы злачынец?</p>
<p>Спектакль ідзе на беларускай мове, працягласць — 2 гадзіны 15 хвілін.</p>
<blockquote><p><strong>Подписывайтесь на наш</strong><strong> <a href="https://t.me/mlynby">Telegram-канал Минская правда|MLYN.by</a></strong><strong>, чтобы не пропустить самые актуальные новости!</strong></p></blockquote>
