Любанскую эксперыментальную базу далучылі да гаспадаркі ў суседнім сельсавеце. Ёсць незадаволеныя.

11 лістапада рашэнне Любанскага райвыканкама аб аб’яднанні дзвюх гаспадарак было абнародавана. Пенсіянерка Любоў Глаз накіравала ў «МП» ліст з просьбай паспрыяць у аднаўленні Любанскай эксперыментальнай базы, заснаванай у якасці саўгаса «Любанскі» Героем Сацыялістычнай Працы Эмануілам Модзіным.

Тым часам некалькі дзясяткаў жыхароў Соснаўскага сельсавета падпісалі адпаведны зварот да старшыні Мінскай абласной арганізацыі Беларускага прафсаюза работнікаў АПК Міхаіла Боды. Па першы каментарый мы звярнуліся да старасты Соснаў-2 Мікалая Вяроўкі, які 27 год быў старшынёй Соснаўскага сельсавета, што на мяжы трох абласцей.

Мікалай Вяроўка распавёў, што Малыя Гарадзяцічы пры Модзіне, наадварот, уваходзілі ў саўгас «Любанскі», які меў доследныя палі для вывядзення новых сартоў насеннай бульбы, у тым ліку Адрэты. У Соснах працавалі свінаферма і птушкаферма, дзе разводзілі качак і курэй. На мясакамбінат здавалі да 150 тон мяса птушкі. У дзяржаўнай уласнасці знаходзілася 87% жылля —  двухпавярховых шматкватэрных дамоў, якія да 1987 года мелі цэнтральнае ацяпленне. Дзейнічалі лазневы камбінат, майстэрня па рамонту абутку і пральня. У саўгасе працавалі 4 Героі Сацыялістычнай Працы і 8 кавалераў ордэна Леніна.

Па сённяшні дзень у Соснах-2, якія перайменавалі ў 2013 годзе, дзейнічае багатая сацыяльная інфраструктура: участковая бальніца з аддзяленнем хуткай дапамогі і паліклінікай, ашчадная каса і Дом культуры, сярэдняя школа №2 і дзіцячы садок на 140 месцаў з мармуровай падлогай, куды возяць дзяцей з усіх навакольных вёсак.

Разам з тым сёлета школа засталася без 10-га класа, а ў дзіцячым садку засталося 21 дзіця. А яшчэ знеслі пару двухпавярховых шматкватэрных дамоў з ліку ведамаснага жылля, больш  паловы якога пустуе.

З іншага боку, сёлета на электраацяпленне перайшло 15 дамоў. Сярод іх першы электрадом Соснаў-2 належыць старшыні Соснаўскага сельвыканкама Алене Кавальчук.

20 жніўня 2021 года органы прымусовага выканання апавясцілі Любанскую э/б і «Гарадзяцічы-Агра» пра наяўнасць у іх запазычанасці. Са слоў Мікалая Вяроўкі, пры ўсіх перавагах Соснаў-2 Любанскі раённы выканаўчы камітэт абраў Малыя Гарадзяцічы ў якасці цэнтра аб’яднання, бо там больш насельніцтва працаздольнага ўзросту.

Папярэдне Любанскі райаграсэрвіс далучыў да сваёй даччынай структуры ў Малых Гарадзяцічах гаспадарку ў Калінаўцы, што забяспечыла перавагу пры чарговым аб’яднанні. Пры гэтым у склад КСУП «Любанская э/б» уваходзіла па малочнатаварнай ферме ў Барыкове і Жалах, а таксама пасёлак Ямнае.

Асноўнай нязручнасцю ў гэтай сітуацыі для пенсіянераў стане плата за кватэру.

У якасці яшчэ аднаго прыкладу па Соснаўскім сельсавеце Мікалай Вяроўка назваў сельскагаспадарчае ўпраўленне «Загальскі», якім валодае Мінскае арэнднае прадпрыемства індустрыяльнага домабудавання (МАПІД). Матчына кампанія забяспечвае яму патрэбныя пазыкі на земляробскую тэхніку. Сярод іншага, стараста Соснаў-2 прапанаваў пашырыць практыку перадачы зямель сялянам для вядзення фермерскай гаспадаркі, каб павысіць плацежаздольнасць земляробаў. Мікалай Вяроўка прывёў у прыклад агракамбінаты Мінскай вобласці.

Старшыня Соснаўскага сельвыканкама Алена Кавальчук прызнала, што асноўнай нязручнасцю для пенсіянераў, якія складаюць большасць жыхароў ведамаснага жылля ў Соснах-2, з’явіцца плата за кватэру. Прымаць гэтую плату бухгалтар з Малых Гарадзяцічаў будзе прыязджаць толькі раз на месяц.

Разам з тым бухгалтар Ларыса Сулін, якая раней працавала ў галоўнай канторы Любанскай э/б і цяпер ездзіць у Малыя Гарадзяцічы, паведаміла, што прычынай далучэння гаспадаркі паслужыла працяглая адсутнасць кіраўніка. Пры гэтым галоўны аграном адмовілася выконваць яго абавязкі.

Ларыса Сулін удакладніла, што плату за жыллё з работнікаў утрымліваюць з іх зарплаты. Што тычыцца пенсіянераў, бухгалтар знайшла рашэнне нават для рэдкага выпадку Любові Глаз, у якой няма ўласных сродкаў сувязі для анлайн-аплаты. Справа ў тым, што Ларыса Сулін сама жыве ў Соснах-2, і ёй можна перадаць грошы ў любы дзень, на наступны яна ўсё роўна завязе іх у Малыя Гарадзяцічы, дзе цяпер працуе.

Пры гэтым у аграгарадку дзейнічаюць аддзяленні Беларусбанка і «Белпошты». Варта дадаць, што між Соснамі-2 і Малымі Гарадзяцічамі двойчы на дзень ходзіць аўтобус, а таксама мікрааўтобус. Таму ёсць магчымасць ездзіць у галоўную кантору, якая цяпер знаходзіцца ў іншым сельсавеце.

Алена Кавальчук запэўніла, што аб’яднанне гаспадарак не адаб’ецца на мясцовым бюджэце. Прынамсі, падатак на нерухомасць, зямельны падатак і дзяржаўныя пошліны па-ранейшаму будуць збіраць і з ААТ «Гарадзяцічы-Агра».

Упраўленне па сельскай гаспадарцы і харчаванню Любанскага райвыканкама прывяло ў якасці прыкладу леташняе далучэнне ААТ «Палессе-агра» ў Камунараўскім сельсавеце да ААТ «Юркавічы» ў суседнім Ляхаўскім.

Урэшце, старшыня камітэта па сельскай гаспадарцы і харчаванню Мінаблвыканкама Васіль Сысоеў падкрэсліў, што ў абодвух выпадках і Любанская эксперыментальная база, і «Палессе-агра» былі неплацежаздольнымі прадпрыемствамі з прычыны стратнасці. Таму выглядае, што аб’яднанне найперш паслужыць задачы захавання працоўных месцаў. Адміністрацыйны будынак эксперыментальнай базы ў Соснах-2 плануецца ўвесці ў гаспадарчы абарот ужо ў адпаведнасці з новым прызначэннем. Агульная плошча сельскагаспадарчых зямель «Гарадзяцічаў-Агра» цяпер складае ажно 10 586 га. Мабыць, неўзабаве і ў Любанскім раёне з’явіцца першы ўласны агракамбінат, чые гатовыя малочныя вырабы можна будзе набыць у крамах двухмільённага Мінска.

Подписывайтесь на наш Telegram-канал Минская правда|MLYN.by, чтобы не пропустить самые актуальные новости!