Як прайшлі «Зажынкі» у «Багушэвічах»
Святочна і весела прайшлі «Зажынкі» на пасевах трыцікале ў ААТ «Багушэвічы», дзе сабраліся кіраўнікі і вядучыя спецыялісты сельгаспрадпрыемстваў раёна.
Старт галоўнай сельскагаспадарчай кампаніі ўрачыста далі старшыня Бярэзінскага райвыканкама Дзяніс Дзішук і яго першы намеснік, начальнік райсельгасхарчу Карына Аруцюнян. Яны першымі павіншавалі камбайнераў з пачаткам жніва, прынялі хлеб са збожжа старога ўраджаю і пажадалі ўсім важкіх намалотаў.
— Здаецца, яшчэ зусім нядаўна селянін шчодра засяваў раллю збожжам, а вось ужо надышоў час убіраць вырашчаны ўраджай, — гаварыў Дзяніс Дзішук. — Патрэбна абмалаціць звыш 13 тысяч палеткаў збожжавых культур. Вядома ж, не ўсе атрымалася, што было намечана, але мяркую, што ўраджайнасць абяцае быць на парадак вышэй мінулагодняй.
— Добрага вам надвор’я, — зычыла ўсім удзельнікам жніва Карына Аруцюнян, — і моцнага здароўя камбайнераў, бо цяпер у іх руках нашы важкія намалоты. Жадаю працаваць без страт і траўматызму. Да будучых сустрэч на палетках!
Зажынкі — старажытнае свята. Таму сялянскую вернасць традыцыям продкаў прадэманстраваў народны сямейна-абрадавы гурт «Радзіна» Новінскага СДК. Ды і як ісці на добрую справу без Боскага бласлаўлення. Прачытаў малітву і акрапіў святой вадой сельскагаспадарчую тэхніку іерэй Анатоль.
Жыццё не стаіць на месцы. Вось і да старадаўніх традыцый далучаюцца новыя. Так, на раённым свяце «Зажынкі» прайшоў конкурс на лепшы сноп і вяночак са збожжа. Тут перможцамі ў першай намінацыі сталі ў адпаведным парадку сельгасфіліял «Здравушка–агра», ААТ «Багушэвічы» і сельгасфіліял «ОМА», а ў другой — ААТ «Багушэвічы», сельгасфіліял «АграМАЗ» і ААТ «Бярэзінскі райаграсэрвіс». Падарункі ім уручалі асабіста начальнік райсельгасхарчу Карына Аруцюнян, старшыня райкама прафсаюза работнікаў аграпрамысловага комплексу Марыя Каўзуновіч.
Гасцінна віталі паважаных гасцей у ААТ «Багушэвічы». Тут гаспадары прадстаўнікам кожнай гаспадарцы ўручылі каравай з сімвалічным надпісамі падарунак. Не забыліся арганізатары і пра галоўных віноўнікаўсвята. Кожны багушэвіцкі камбайнер атрымаў перад жнівом «ссабойку».
І вось нарэшце дырэктар ААТ «Багушэвічы» Юрый Сухоцкі дае старт раённаму жніву:
— Экіпажы па машынах!
І шэсць магутных камбайнаў адпраўляюцца на палеткі. У добры шлях, за шчодрым ураджаем і важкім коласам!
Наперадзе цяжкія будні ўсіх удзельнікаў жніва за ўраджай гэтага года. І, вядома, хочацца пажадаць удалай гарачай пары.
Мілана Трапянок
Фота: Юлія Букель
Подписывайтесь на наш Telegram-канал Минская правда|MLYN.by, чтобы не пропустить самые актуальные новости!