Як вырашаецца праблемнае пытанне абезжалезвання вады ў Станькаве

06.03.2023 15:46
(обновлено: 10.03.2023 08:34)

Як вырашаецца праблемнае пытанне абезжалезвання вады ў Станькаве

Фото: предоставлено читательницей

У Дзяржынскім раёне нямала паселішчаў мае крыніцы вады з павышаным утрыманнем жалеза. Гэта робіць яе прыдатнай толькі для тэхнічных патрэб. Для пераўтварэння такой вады ў пітную выкарыстоўваюць станцыі абезжалезвання. Аднак у шэрагу населеных пунктаў пытанне дагэтуль стаіць востра нават з улікам працы адпаведных станцый.

Наша чытачка са Станькава даслала Пратакол № 618 даследавання пітной вады, зацверджаны 13 лютага для проб з вадаправодаў у вёсцы Карачуны, горадзе Дзяржынску, пасёлку Энергетыкаў і вайсковым гарадку Станькава.

Згодна з даследаваннем, якое Дзяржынскі раённы цэнтр гігіены і эпідэміялогіі правёў 9 лютага, у васьмі з 11 месцаў адбору адзначалася перавышэнне нормы па жалезе. У адпаведнасці з тэхнічным нарматыўнымі прававымі актамі такая норма складала 0,3 мг/дм3 для паселішчаў з уласнай станцыяй абезжалезвання. Адхіленне ад нормы адсутнічала толькі ў Дзяржынску.

Найперш па кампетэнтны каментарый мы звярнуліся да галоўнага інжынера «Водаканала Дзяржынскага раёна» Аляксея Чайкоўскага, бо да водаканала адносяцца станцыі абезжалезвання. Аляксей Чайкоўскі паведаміў, што ў Станькаве выкарыстоўваюць дзве з чатырох існых там свідравін вады. На станцыі абезжалезвання, што забяспечвае вайсковы гарадок надоечы правялі электрамантажныя работы, каб абсарбент лепей прамываўся. У бліжэйшыя дні сакавіка чакаюцца вынікі новай пробы вады. Разлік робіцца на тое, што на пастаяннай аснове запрацуе адпаведная апрацоўка вады, якая дазволіць праблеме перастаць паўторна ўзнікаць.

Прынамсі дагэтуль станькаўцы рэгулярна скардзіліся на штосезоннае пагаршэнне якасці вады ўжо некалькі гадоў. Разам з тым, галоўны інжынер звярнуў увагу на шматбаковасць забеспячэння жытла пітной вадой. Справа ў тым, што дамавым вадаправодным камунікацыям ужо больш за 40 гадоў. Сярод іншага, Аляксей Чайкоўскі паведаміў, што працы на асобнай станцыі абезжалезвання для індывідуальнай забудовы Станькава чакаюцца праз два месяцы.

Нашыя чытачкі пачалі скардзіцца на якасць вады ў Станькаве яшчэ ў 2018 годзе.

У Дзяржынскім раённым цэнтры гігіены і эпідэміялогіі доктар камунальнай гігіены дадаткова патлумачыла выкарыстанне нормы па жалезе ў 0,3 мг/дм3 для пітной вады. Справа ў тым, што ўжо пры гэтым узроўні з’яўляюцца пах, мутнасць і колер, на якія і скардзяцца спажыўцы. У сваёй скарзе нашая чытачка падкрэсліла і іншую акалічнасць. Яна адзначыла перыядычнае паляпшэнне якасці вады на пару месяцаў ў ранейшыя гады.

У прыватнасці прывяла прыклад замены труб у сістэме ацяплення, замену абсарбентаў і прамыванне труб. З іншага боку, праз амаль кожную пару месяцаў назіралася вяртанне ржавай вады, за якую яшчэ ў 2020 годзе рабілі пераразлік як за тэхнічную. Меркаванымі прычынамі чытачка назвала патрэбу ў своечасовай замене абсарбентаў на станцыі абезжалезвання і адсутнасць замены труб у доме з боку «Дзяржынскай жыллёва-камунальнай гаспадаркі».

Пробы вады ў Дзяржынскім раёне:

Месца пробы	Жалеза, мг/дм3
Карачуны	2,1
Дзяржынск	0,23
Пас. Энергетыкаў	0,46—1,8
Станькава	0,25—0,83

Іншая жыхарка вайсковага гарадка Вольга паскардзілася на выдаткі ў сувязі з жалезістай вадой нават у якасці тэхнічнай. У прыватнасці давялося двойчы рабіць разводку трубы, бо яе дыяметр звузіўся на траціну. Таксама забіваліся краны і патрабавалася замена сетак. Пры гэтым Вольга згадала выкарыстанне фільтраў механічнай ачысткі на ўваходзе і на колбе, а таксама перад катлом. Сярод паляпшэнняў яна адзначыла колер вады, але падкрэсліла, што пах і прысмак засталіся.

У сувязі з гэтым вада сушыць скуру і даводзіцца набываць ваду ў пляшках. Акрамя накіпу ў імбрыку і рондалях, у пральнай машыне ўзнікае ржаўчына, ад чаго немагчыма памыць белае адзенне. Для сямейнага бюджэту прывоз вады з Дзяржынска абыходзіцца ў страты грошай і часу. Прынамсі двойчы на тыдзень даводзіцца вазіць па 40 літраў з калодзежа ў райцэнтры.

Разам з тым, яна згадала, што ў іх замянілі трубу пасля прыводу рэвізораў у кватэру. Але гэты крок насустрэч з боку «Дзяржынскай ЖКГ» тычыўся толькі некаторых кватэр у 4-павярховых дамах афіцэрскага саставу. Пяціпавярхоўкі яшчэ чакаюць на такую замену.

Сярод іншага, жыхарка прывяла прыклад «Графскай» вады, якую прадаюць у пляшках і здабываюць з артэзіянскай свідравіны глыбінёй 200 метраў зусім побач у вёсцы Станькава. Атрымліваецца, што пытанне не такое і невырашальнае. Прынамсі на 2025 год распрацавалі праект новай свідравіны. Пры гэтым надзённасць такога збудавання падкрэслівае тое, што з прыватнай забудовы з’ехала істотная частка жыхароў.

Урэшце, у справе вырашэння пытання з вадой у Станькаве з боку «Дзяржынскай жыллёва-камунальнай гаспадаркі» удалося атрымаць каментарый ад дырэктара Разлікова-даведкавага цэнтра Дзяржынскага раёна Ірыны Козак. Яна паведаміла, што сёлета запланавалі пачаць капітальны рамонт будынкаў у вайсковым гарадку.

Такі рамонт прадугледжвае замену труб унутры дамоў, якія і працягваюць псаваць якасць вады нават пасля яе апрацоўкі абсарбентам на станцыі абезжалезвання. Пакуль жа жыхарам застаецца працягваць завоз пітной вады з калодзежаў за некалькі кіламетраў і набываць яе ў пляшках, хоць тая здабываецца зусім побач.